SHAYI NUM NI A SARI SADANG

Ga Si Kaji Kaba galaw na

Amyu shayi num langai mi gaw masha uhpung uhpawng hte kanawn mazum ai lam hta shainggyim lailen hte bung pre ai hku hkawm sa shamu shamawt chye na grai ahkyak nga ai. Shingrai amyu shayi ni hta nga ra ai tsawm tap ai sari sadang ni hte hpring zup na matu lawu de na lam ni hpe c hye da hkan sa mai nga ga ai.

1.          Hkawm sa sat lawat lam

2.          Bun hpun mawn sum li lam

3,          Tsun shaga ai lam

4.          Malu masha sha ai shaloi hkan sa ra ai lam

5.          Mying masin kuang lai len ni tsawm htap kaja ai lam ni rai nga ai.

                             1. HKAWM SA AI SAT LAWAT LAM

 Hkum hkrang hpe san seng ai hku tawn da ra ai . Masha aman e na hkyi lai ai, wa tsan ai,nyep hkyi ai,lamyin zen  ai lam ni hpe koi ra ai. Lata lamyin ni nchyang hkra sadi ra ai. Masha hte tsap shaga ai shaloi lagaw lakrang da nna nshang madi ai .sumbu manaw da nna tsap ai lam ni sadi ra ai. Manang wa/ jan laika ka ai shaloi makau kaw nna shang hti ai lam ni, Lam hkawm sa ai shaloi san da ai lam hku hkawm ra ai. Manang wa/jan hpe ahtu adawt hkra kau yang tawng ban ra ai. Masha langai hpe azi yu ai, layung hte madi madun ai, kaga arai lamama hte madi madun ai lam hpe koi yen ra ai. Yu mada mayu jang si mani ai hku yu mada ra ai. Masha langai a  hut shai lai lam hpe shalai ai, asawng ai, jahpoi ai lam ni koi gam ra ai. Manang wa lam hkwm wa ai kaw hkap shaga mayu yang shi hte rau hkawm nna shaga mai ai. Lam kaw jahkring da nna woi shaga ai lam sadi ra ai. Tinang garai nchye ai wa/jan hpe shaga mayu yang ahkang shawng hpyi ra ai, Dung ai shaloi chyip dung ra ai, lahput, labawp shakra nna dung ai lam koi yen ra ai. Masha ni a nta de shang na rai yang ahkang shawng hpyi ra ai. Manam gawk hta lai nna waw shang le shang, wawra chyan yu, ndai masawp yu, masha ni ag gawk kata de lagu yu ai lam ni nmai galaw ai, grai zai ai lam rai nga ai.

                                              2. BUHPUN MAWN SUMLI AI LAM

Hpun palawng bu hpun ai hpe yu mada nna masha langai a nga sat nga sa madng zai ai, nzai ai hpe maram lu ga ai. Bu hpun palawng gaw madi hkun hkraw ai, katsi ai kaw nna makawp maga ya lu na matu re. Bu hpung palawng gaw yu htuk, yu tsawm na matu rai nga ai. Bu hpung palawng ni hpe mawn sumli ai shaloi manu dan ai hte lak lai ai hpun nba  nrai ra ai, tinang hte htap htuk ai hpe chye bu hpun na ahkyak ai, Nawku jawng sa ai rai kun, poi shaingra de sa ai kun, bungli galaw ai de sa ai rai kun, masa hta hkan nna bu hpun sumraw chye ra ai. Masha lapran hte lam nmaw hkan ya sha ya sha labu bu sharai ai lam koi ra ai. Amyu shayi sha ni gata palawng hpe tsinang hte htap htuk hkra hpun chye ra ai. Ashun awm, anoi abya rai nmai bu hpun ai.Labu bu ai shaloi, prat hta hkan nna kadun ai , galu ai lam nga ai raitim, dung ai, rawt ai shaloi masha ni nmu mada gginga ai hpe ndawng hkra sadi ra ai. Hkyep din din kawk e, kak e asawt asat nga nsen shapraw hkawm ai lam koi yen ra ai. Salat kap ai hpun palawng ni hpe hkrut kau shing nrai shing nrai nbung jan hta lam nna salat sama wai mat ai hpang gum ba bu hpun ra ai. Myiman hpe ladu lai chya shakya ai lam n galaw ai sha, tinang hte htuk hkrak ai hku ram daw chye shatsawm ra ai. Bu hpung ai alm hta prat dep ra ai raitim, ti nang a matu hpyen ntai hkra sa di ra ai.
 Ngam nga ai daw hpe bai matut na re .